雞毛蒜皮的瑣事

這次的文章我會使用廣東話口語，方便表達憤怒。

今日發生左一件對於我自己之外的所有人，都非常之雞毛蒜皮的事，而且好可能成件事個on9仔都係我，但我真係非常之嬲，亦都無任何方法可以比我發洩，唯有寫下文，希望有D用啦，唔係真係會訓唔著。

話說今日係平安夜，好開心居然有兩條囡肯約我夜晚去飲野，講真係幾開心，毒撚黎講邊有咁多依D機會。首先幫個兩條囡改名先，叫A囡同B囡，咁A囡就問我，佢的原話係「B囡問今晚出唔出去飲野 (笑喊emoji)」，咁我更係話好嫁，跟住我再問A囡「幾點」，A囡就講「9點後」。

如是者到左夜晚9點，我就係我屋企附近等佢地啦 (佢地兩個都住係附近)，唔見人就send左句野比A囡，「你地ok同我講wo，我依家係屋企附近」。半個鐘頭之後，依然沒有回應，hang撚左機咁，咁我又無A囡電話，咁我就只好搵B囡啦，結果B囡就同我講，「我地唸住約去LKF/尖咀喎」，我心唸WTF，A囡完全無同我提起要出LKF/尖咀 (兩個地方都離屋企有1個鐘車程)，我個下已經嬲嬲地，點解A囡可以咁冇厘搭霎，連地點唔係屋企附近都唔down聲。

後黎先知啦，原來「飲野」對個兩條囡黎講，預設地點就係LKF/尖咀，係我依D傻鳩平時無玩開，鄭係識係屋企on99打飛機先會以為「飲野」的預設地點係屋企附近。

算啦，我都照出去啦，同兩條囡飲野wo，唔係咁就縮沙下話，出到去，已經10點半。本來唸住話係屋企附近「飲野」，傾兩三個鐘，12點幾番到屋，perfect，聽日要早起身都冇問題！不過而家唔係啦，已經10點半，番去車程都要1個鐘，姐係頂盡傾1個鐘，都算啦，好過冇。跟住10半又等到11點，最慘係咩呀，中間打電話比B囡又唔應，我又冇A囡電話wo，send whatsapp ig 全部都石沉大海，兩條友都好似比黑洞吞撚左咁，我就on99咁企左半個鐘。

中間我重係到唸呀，會唔會係佢地兩條囡想玩鳩我依個毒撚，約佢出黎撚下佢，再爽9佢約，等佢之前約A約得咁開心丫啦 (依單野一陣會講)，當然啦，唸深D就知唔會，要玩都唔玩毒撚啦，貪得意咩，一陣毒撚又以為你對佢有意思。

或者本來都冇咁嬲，我都知D囡本來就唔會守時，但因為我第日要番工，又唔想捱夜，搞到我有種時間限制的feel，所以我個下真係有D火滾，11點多D又打多幾次電話比B囡，都係冇人聽。唉算撚數，留底個whatsapp番歸算Q數。

講到尾，其實成件事我係好撚嬲A囡冇厘搭霎，唔單止係因為依單野，重係因為之前我約A囡的經歷。

話說A囡有開ig shop，咁因為我最近都搞緊ig shop，所以想話約出黎傾計睇下可唔可以取D經。可能因為我真係太廢太毒，所以佢又有D驚我溝佢？A囡唔係好有興趣，對於我的邀約，佢覆左句「傾咩 (笑喊emoji)(笑喊emoji)(笑喊emoji)」，而且冇firm任何時間/time range。對我黎講啦，我唔想去的邀約，就係會咁樣覆人。不過都冇計啦，有求於人，都要試下繼續約。所以我就再firm多幾個時間，之後A囡就不讀不回。

我心唸，覆一句話「我睇睇先」都好丫，不讀不回算點，依家係咪驚我溝你，搞到你好大壓力，唔知點覆呀？你放心，毒撚我非常之花心，只要係有小小姿色的囡，街上見到又好，咩都好，我都會唸住點樣同佢係床上面翻雲覆雨，差D連個仔叫咩名都唸埋~

你信下我好唔好？我有自制力嫁，唔通毒撚做D咩都係想溝囡咩？真係對唔住囉，我真係只係想聽下你生意搞成點，我身邊又冇乜frd係搞生意，所以我真係好開心可以有個frd比我取下經，但係我發現佢根本就唔想理我。結果，住樓上樓下，約個時間傾個計都咁撚難。

所以其實成件事，我真係嬲自己居多，點解我可以咁無魅力，咁無社交手腕，想問下生意野都搞到人地咁大壓力？不過更有可能係佢根本就冇壓力，所有野都只係我自己的內心小劇場，唔怪得我會咁毒。點解我做D咩都好似係想溝人地咁，假設我靚仔D或者有能力D，成件事會唔會順D？又點解我可以咁廢，連「飲野」都覺得會係屋企附近飲，會唔會無知左少少？依D充滿偏見的唸法又可以同邊個講？結果我就只可以係到自怨自艾，打篇野比個天睇下。

2021年12月24日

後話：打完之後個心情真係好好多，理清左好多野，我大概知要點做了。